14.03.2007
Təbii qazın topdansatış, emal və nəql tariflərinin tənzimlənməsi barədə Azərbaycan Respublikası Tarif (qiymət) Şurasının 2007-ci il 02 fevral tarixli 8 nömrəli qərarına əlavə və dəyişikliklər edilməsi barədə
QƏRAR № 12
Azərbaycan Respublikası Prezidentinin «Azərbaycan Respublikasının Tarif (qiymət) Şurası haqqında Əsasnamə»nin təsdiq edilməsi barədə» 2005-ci il 26 dekabr tarixli 341 nömrəli Fərmanına, Azərbaycan Respublikası Nazirlər Kabinetinin 2005-ci il 30 dekabr tarixli 247 nömrəli qərarı ilə təsdiq edilmiş «Dövlət tənzimlənməsi tətbiq olunan tariflərin (qiymətlərin) formalaşması və tətbiqi üzərində dövlət nəzarətinin təmin edilməsi” Qaydaları»na və Azərbaycan Respublikası Tarif (qiymət) Şurasının 2007-ci il 14 mart tarixli iclasının protokoluna əsasən QƏRARA ALIR:
1.“Təbii qazın topdansatış, emal və nəql tariflərinin tənzimlənməsi barədə” Azərbaycan Respublikasının Tarif (qiymət) Şurasının 2007-ci il 02 fevral tarixli 8 nömrəli qərarının 1-ci bəndinin cədvəl hissəsinə aşağıdakı redaksiyada 4-cü və 5-ci sətir əlavə edilsin.
4. | Magistral kəmərlərə birbaşa qoşulmaqla istehsal məqsədləri üçün təbii qaz istehlak edən kimya, alüminium, dağ mədən filizi əsasında polad əritmə, elektrik enerjisi istehsalı müəssisələri (aylıq istehlakı 15 milyon m3-dən az olmamaq şərti ilə) | 42,00 |
5. | 4-cü bənddə göstərilən istehlakçılar üçün sabit haqq | 3,00 |
2. Cədvəlin 4-cü bəndində göstərilən istehlakçılara satılan təbii qazın nəqli, təbii qazın qüvvədə olan nəql tarifləri ilə həyata keçirilir.
3. 2-ci bənd 3-cü bənd hesab edilsin.
4. Təsdiq olunmuş yeni tariflər 2007-ci il 8 yanvar tarixindən tətbiq edilsin.
5. Bu qərar imzalandığı gündən qüvvəyə minir.
Azərbaycan Respublikası
Tarif (qiymət) Şurasının sədri H.Babayev